Osteguna izanen da San Martin eguna, azaroaren 11; egun seinalatua Aranon. Eta hori ospatzeko, hitzordu bikoitza jarri dute astebururako.
Larunbat iluntzean izanen da aurrenekoa, afalorduan: Auskalo zeinek jarriak bertso jarri musikatuen emanaldia eskainiko dute Unai Agirre eta Eñaut Agirre bertsolariek, eta Imanol Kamio musikariak. Elkarteko arkupean ariko da hirukote hernaniarra, 20:30etan hasita; eta beste hainbat herritan eskainitako saioa, egokitu eginen du Aranora ekartzeko: Aranoko bertso zaharrak, bertako istorioak... kontatuko dituzte, emanaldian.
Afari baten bueltan izanen da emanaldia, eta gisatua eta gaztainak prestatuko dituzte bertan, aranoarrek gozatzeko. Afariaren martxara egokituko dute emanaldia, Agirre anaiek eta Kamiok ere.
Esku pilota jaialdia, igandean
Hurrengo egunean, aldiz, esku pilota izanen da protagonista, eguraldiak lagunduz gero. Ados Pilotarekin batera, jaialdia antolatu dute Aranoko frontoian, eguerdiko 12:00etan hasita. Lau pilotari ariko dira, binakako partidua jokatzeko: Iera Agirre eta Oihana Orbegozo, Eneritz Arrietaren eta Olatz Ruiz de Larramendiren kontra.
Udaran ere antolatu zuten jaialdi bat herrian, Ados Pilotarekin, emakumezkoen esku pilotari bultzada bat emateko asmoz. Orduan, Plazaz Plazako txapelketaren final laurdena zen jokatzekoa Santio egunez; baina atzeratu egin zen Covid-19aren eraginez, eta finalerdietako bat jokatu zuten azkenean Aranon, abuztuaren 15ean.