Aurrera jarraituko dute aranoarrek, igande honetan bertan, nekazaritza lanak elkartrukatzeko egitasmoarekin. Oraingoan, hazitegia sortu eta haziak ereiteko auzolana prestatu dute, eta Abañoko zentralean jarri dute zita, goizeko 11:00etan hasita. Goiz osoan zehar arituko dira lanean, bertan.
Piketeak egiten ikasteko saioa izan zuten otsailaren 13an, Plazako Bordan, auzolanak eta baserriko lanak jendaurrera plazaratzeko asmoarekin. Eta horixe izanen da helburua, etzi, Dagoenean Bonbon taldeak, Aranoko Udalak eta Cederna Garalurrek antolatu duten saioan.
Haziei eta hazitegiei buruz ariko dira bertan, bertaratuen artean konpartitzeko jakintzak eta ezagutzak.
Parte hartzeko, aldez aurretik abixatzea beharrezkoa
Abañora bertaratu eta saioan parte hartu nahi duenak, aldez aurretik abixatu beharko du. Horretarako, email bidez idatzi dezake, arano.udala@gmail.com helbidera; edo bestela, Xabi Cueto zinegotziari jakinarazi.
Partehartzaileei, eskatu diete eraman ditzatela berrerabiltzeko ontziak, bertan haziak ereiteko. Izan daitezke yogurt poteak, esnearenak... Eta era berean, etxeko haziak izanez gero, horiek eramatea ere eskatu diete, elkarren artean trukatzeko.
Parte hartzera animatu eta bertaratzeko deia luzatu diete antolatzaileek, herritarrei.
Baserriko lanak ezagutzera emateko saioetan, hirugarrena izanen da igandean eginen dutena, aranoarrentzat. Urtarrilaren 28an egin zuten aurrenekoa, Maisuenean, eskualdeko elikadura lantzeko. Eta piketeak egiteko saioa izan zen bigarrena.