Koronabirusaren pandemia lehertu zen egunetan hartu zuen Juan Ramon Lizarragak, Goizuetako harategia, Ximon Apezetxeak utzi ondoren. Eta orain, Aranoko harategi zerbitzua ere jarri du martxan: ostiralero igotzen da, arratsaldeko 16:00etan, aranoarrek egindako eskariak eramatera, herrira bertara.
Urtetan eskaini zuen zerbitzu hori Ximon Apezetxeak Aranon, eta zerbitzu hori ematen jarraitzeko asmoa erakutsi du Juan Ramon Lizarragak, orain. «Eskertzekoa da, Aranon harategi zerbitzua eskaintzen jarraitzeko prestutasun hori erakustea. Primerako zerbitzua da hori, herritarrentzat», azpimarratu du Aranoko Udalak.
WhatsApp bidez zein telefonoz egiten dizkiote eskaerak harakinari, astean zehar. Eta berak prestatu, eta ostiralean eramaten ditu bertara. Ordainketa egiteko, berriz, bi modu daude aukeran: txartelarekin ordaindu daiteke, datafonoaren bitartez; edota Bizum bidez egin daitezke ordainketak, telefono mugikorra erabilita.
Harakinarekin hurrengo hitzordua, bihar arratsaldean bertan daukate aranoarrek, herriko plazara gerturatuta.