Badator San Martin eguna; azaroaren 11. Horren harira, euskara zerbitzutik, saio berezia antolatu dute gaurko. Iñaki Perurena harrijasotzaile ezagunak Harria. Maitasun istorioa saioa emanen du, arratsaldeko 18:00etan hasita, Maisuenean.
Ez da gaurko ekitaldi bakarra izanen, hala ere. Izan ere, Perurenak saioa bukatuta, talo jatea izanen da.
Landa eremuko emakumeak gogoan, erakusketa
Bestalde, urrian izan zen Landa Eremuko Emakumeen Nazioarteko Egunaren harira, hainbat ekitaldi antolatu dira ordutik Gizarte Zerbitzuetako Mankomunitateak bultzatuta. Hauek borobiltzeko, Baratze Kritikoa erakusketa jarri da Aranon, eta biharkoa izanen da hau ikusteko azken eguna.
Goiz eta arratsaldez, gaur eta bihar
Erakusketa zehazki Mugarik Gabe elkarteak antolatutakoa da, eta elikadura burujabetza dauka gai nagusi, genero ikuspegitik begiratuta. Kritikoa deitzen diote, «harago begiratzen» dutelako, «inguratzen gaituena eta gure burua zalantzan jarriz».
Hasiera batean, hilaren 18ra arte ikusi ahal izanen zen erakusketa, baina egutegian aldaketak egin dira, eta bihar arte izanen da ikusgai, Maisuenean. Gaur, goizez irekiko da, 10:00etatik 14:00etara. Bihar, berriz, goiz eta arratsaldez; 10:00etatik 14:00etara eta 17:00etatik 20:00etara.