«Errespetua galdu dio EH Bilduk, elkarbizitzaren arloan egindakoari»

Agerraldia egin zuten asteaz­kenean oposizioko hiru alderdiek, EAJ-PNV, Orain Hernani eta PSE-EEk, salatzeko EH Bil­duk izandako jarrera, azkeneko Plenoan: «errespetua galdu zion, talde politiko guztiok el­karbizitzaren arloan egindako lanari», adierazi dute.

Pleno horretan, mozio bat aurkeztu zuen EAJ-PNVk, Orain Hernani eta PSE-EEren babesa­rekin, oinarri hartuta «ETAren eta bere ingurukoen indarkeriak eragindako sufrimendua, baina kontziente izanda, gainera, motibazio politikoko bik­tima gehiago daudela, errekonozimendurik jaso ez dutenak. Mozio horrekin, konpen­tsatu nahi genuen desoreka historiko bat, ahaztuta geratu ziren biktima batzuekin», diote.

Azaldu dute, urte eta erdi baino gehiago zeramakiela mozio horrek mahai gainean, talde politiko guztien ekarpenekin, «EH Bildurenak barne»; baina akordioa atzeratuz joan zela, eta horregatik, talde politiko guztiek adostu zutela be­ran­duenez martxoko Ple­noan aurkeztuko zela mo­zioa, «era­bi­lera elektoralistarik ez egi­teko».

«Baina otsaileko Plenoan mozioa aurkeztuta, harrituta ikusi genuen, kontramozioa aurkeztu zuela EH Bilduk. Ho­rregatik, eta EAJren mozioaren kontra bozkatu zuelako, Ple­no­tik alde egin genuen oposizioko hiru taldeok», argitu dute.

«EH Bilduk bere ADNan daramaki enfrentamendua»

Gertatutakoaren ha­ri­ra, Ando­ni Amonarraizek, EAJren bozeramaileak, adierazi zuen, «behar­bada zerbaiten beldur» dela EH Bildu: «eta horregatik ari da ge­zurretan alkatea, dioenean gure mozioa elektoralista dela, eta ez dela guztion artean lan­du duguna». Eta nabarmendu du: «EH Bilduk bere ADNan da­ramaki enfrentamendua, eta bere printzipioa da, edozein bi­tarteko dela egokia, bere helburuak lortzeko». Horregatik, dio «pikutara bidali» duela, Her­nanin urtetan egindako lana, elkarbizitzaren arloan.

Bere aldetik, Jaione Aris­tre­gik, Orain Hernaniren bozeramaileak, kritikatu zuen EH Bil­duk, «gezurra esateaz gainera», ez dituela errespetatu elkarbizitzaren arloan lortutako akor­dioak: «alferrik izan da, EH Bil­durekin elkarbizitzarako egindako lana. Denbora pasatzen uztea da beraien estrategia, uko eginez hernaniarren zati ba­tek sufritutako mina errekonozi­tzeari. Noizbait onartu beharko dugu, eragin zuela haustura sozial bat, oraindik gainditu ez duguna, eta EH Bilduren jarrerak ez du laguntzen».

Azkenik, PSE-EEko Ricardo Crespok ere, «gezurretan ari­tzea» leporatu zion alkateari: «guztion artean adostu zen mo­zioa aurkezteko data, eta ez zi­tza­iola erabilera elektoralista emango. Horren lekuko da el­karbizitza lanak da­ra­maz­ki­en teknikaria. EH Bil­duk akordioa hautsi du, eta ego­era honek erakusten du, al­derdi ba­koitzak dau­kan po­si­zioa, elkar­­bizitza gaietan».

Hiru alderdiek adierazi zu­ten, ez daukatela Gobernu Tal­de honekin lan egiten jarrai­tzeko asmorik, «jarrera alda­tzen ez du­en bitartean. Inbi­di­az ikusten dugu, nola Errenterian, Tolosan, Urnietan edota Eusko Legebil­tza­rrean, EH Bilduk ja­rre­ra kon­s­truktiboagoa daukan; eta Etxe­ra­tek ere, biktimei barkamena es­katuz, jarrera proaktiboagoa era­kutsi du. Her­naniko EH Bil­duren jarrerak, ez du ahalbide­tzen elkarbizi­tzaren normalizaziora bidean aurrera egitea».