Neurria hartu nahian ari dira Hernani Arraun Elkarteko Maialen ontziko neskak. Liga hasieran Xabier Zabala entrenatzaileak azaldu bezala, «akoplatzeko lanak» zeuzkatela bazekiten, baina baita «hiru hilabetetako lana» zela eta «hobetzeko denbora» bazutela ere. Badirudi, hala ere, balantza aldeko jartzen zailtasunekin dabiltzala.
Galtza bete lan izan dute pasa den asteburu honetan ere, bi estropadarekin. Larunbatean, Zumaian, txukun aritu ziren, eta 7garren egin zuten, 11:53,52ko denborarekin. Aurreko lau estropadei begiratuta, aldaketa bazetorrela ematen zuen, 8garren egin baitute horietan. Baina, atzo, Ondarroan, ez zuten zortea aldeko izan, eta 9garren egin zuten (12:19,44).
Gauzak horrela, ETE Ligako sailkapen orokorrean 8garren jarraitzen dute, 59 punturekin. Aurretik Isuntza dute, 10 puntu gehiagorekin, eta atzetik, Ondarroa, 36 punturekin. Aurrenekoak, 118 punturekin berdinduta, Hibaika eta Zumaia dira.
Beste hiru estropada geratzen dira, Kontxako sailkapen estropadaren aurretik.
Zortzigarrenean trabatuta geratu direla ematen du, hortaz, baina Liga hasieran Zabalak aipatu bezala, «txintxo eta gogor, egunerokoan jardun beharrari» tinko eutsiko diote lanak bukatu arte.
Eta oraindik badute lana, baina Kontxa ere gerturatzen ari da. Hiru estropada geratzen dira sailkapen estropadaren aurretik, eta ilusioari eutsiko diote neskek.