Koopfabrika jarri da martxan aurten ere 38 proiektu berrirekin. Iturolan eman zioten hasiera astelehenean. Ekonomia sozial berria eta ekintzailetasun soziala sustatzeko programa da eta aurten hirugarren urtez antolatu da.
Aurkezpen ekitaldian tokiko eragilea den Beterri-Buruntza udaletako lehendakaria Jon Zulueta; Proiektuaren finantzatzailea den Gipuzkoako Foru Aldundiko Joseba Amondarain; EHUko Gezki institutuko Enekoitz Etxezarreta, Mondragon Unibertsitateko HUHEZI fakultateko Aitzol Loyola; eta Olatukoopeko Leire Udabe egon ziren. Beraiekin noski aurtengo egitasmoan parte hartuko duten proiektuetako kideak. Arianne Kareagaren (Lanki Ikertegia-Mondragon Unibertsitatea) eta Beñat Irasuegiren (Talaios Kooperatiba eta Olatukoop) eskutik eman zuten ondoren lehendabiziko formazioa.
Lankidetza saretzea, jasangarria izateko
Jon Zuluetak gogorarazi zuen duela bost urte jarri zutela martxan, Olatukoopekin elkarlanean, hasiera Kooperatzen izenarekin. EHUak eta MUak ere parte hartu zuten, Diputazioaren aportazioari esker. «Gaur egun proiektua nahiko finkatuta dago eta pozgarria da egoitza nagusia Iturolan, elkarlan espazioan kokatzea. Jende asko pasa da urte hauetan. 25 proiektu sozio-ekonomiko daude martxan eta bertan 60 pertsonek bertan lan egiten dutenak. Iturolan daude kokatuak gehienak eta beste batzuk sustraiak kanpo bota dituzte. Denak ere balore parekideak, partehartzaileak eta jasangarriak dituztenak. Etorkizunari begira hori da gure nahia; proiektu berriak martxan jartzea. Gipuzkoa osora eta zergaitik ez Euskal Herri osora zabaltzea gustatuko litzaiguke. Sare horrek ekonomia justoago bat eta hobeago bat egiten lagundu dezake».
Joseba Amondarainek bi ideia nagusi plazaratu zituen «lankidetza eta enpresa eredua. Lankidetzan egindako proiektuak dira Koopfabrikan lantzen direnak. Gizarte antolamendu konkretu bat ematen dio eta ez da negozioa. Eta hiru erronkeri erantzun egokia ematen die: Zer nolako harremanak dauzkan barnean dauden pertsonekin, zer nolako harremana duen beste motatako enpresekin eta lurraldearekiko konpromezua. Lehiakortasuna ez du bakarrik alde ekonomikotik jorratzen, baita gizarte eta kohesio sozialetik, eta ingurugiro aldetik. Hirurak txertatzen dira Koopfabrikan».
Eneko Etxezarreta eta Aitzol Loyolak ikuspuntu pedagogikotik egin zituzten beraien aurkezpenak Euskal Herriko Unibertsitateko eta Mondragon Unibertsitateko ordezkari eta kooperatibismoan aditu eta irakasle bezala. «Espazio formatiboetan gizarte ekonomia lantzen duten egitasmoak bideratzea nahi dugu. Islada edo tarte gutxi du hezkuntzan esperientzia kooperatiboak, gure gizartean duen garrantzia izan da. Horri aurre egiten diogu formazioen bitartez» azpimarratu zuen Etxezarretak.
«Ekintzailetza proiekzio komunitario batetik»
Loyolak ildo beretik jarraituz kooperatibismoaren garapen soziala azpimarratu zuen. «Hori da guk ematen dugun formakuntza eta proiektuak bideratzen lagundu. Ekintzailetza ulertzeko beste modu bat lantzen dugu, ez indibidualista, baizik eta proiekzio komunitariotik».
Olatukoopeko Leire Udabek ekonomia sozial eraldatzailearen ikuspuntutik hitzegin zuen. «Beste eredu batetik gure proiektu sozio-ekonomikoa nahi genuen garatu eta Koopfabrikak hori bideratzen laguntzen du. Lankidetza, interkoperazioa eta lurraldetzea horretarako ezinbestekoak dira. Lanan burujabetza da beste klabeetako bat. Hori gauzatzea da helburua».