Iritsi dira aurten ere Goizuetako Fiestak. Txupinazoa asteazkenean botako bada ere, gaurkoa dute gazteenek, Umeen Eguna.
Musika eta kirola, ardatz
Goizean goiz, diana joko duenaren beharrik gabe, Umore Ona Koruak esnatu eta bilduko ditu herritarrak festara, goizeko 08:00etan kantuan abiatuko diren auroroekin. Segidan, 09:00etan aterako da Irumaita txaranga gaztea ere.
Meza izango da gero, 11:00etan, eta haurrek bertako jantziekin hartuko dute parte. Eta meza bukatuta, pilota partiduak jokatuko dituzte herriko pilota eskolako haurrek, 12:00etan.
Indarrak biltzeko bazkaria ikastolan eginen dute umeek, 14:00etan, eta 16:00etan, herri kirolak izanen dituzte plazan, eta ondoren, berendua. Musika izanen da gero berriro, 18:30etan, Txantxariak taldearekin, eta Goittikiren aldeko bingoarekin bukatuko dute eguna.
Otorduetarako, txartelak
Datozen egunetarako otorduetarako txartelak ere jarri dira salgai. Hilaren 14an, koadrilen paella prestaketan eta bazkarian parte hartzeko, Amaia kafetegian erosi behar dira; 11 euroan langabetuentzat, eta 14 euroan, langileentzat. Amabirjin eguneko afari herrikoirako, berriz, 15 eta 18 euroan.
Azkenik, hilaren 18ko Peñan bazkarirako, Amaiarenean eta Estankoan erosi daitezke 30 euroan, hilaren 16ra arte.
UMEEN EGUNA
08:00, Auroroak Umore Ona Koruaren eskutik.
09:00, Irumaita txaranga herrian.
11:00, Meza, haurrak bertako jantziekin dijoaztela.
12:00, Haurren pilota partiduak.
14:00, Umeen bazkaria ikastolan.
16:00, Herri kirolak plazan, Kulkirekin.
Ondoren, Haurrentzako berendua Guraso Elkartearen eskutik.
18:30, Kaleko musikariak plazan:?Txantxariak.
20:30, Goittikiren aldeko bingoa ikastolan.