TREBA gurasoak programaren baitan, beste hitzaldi bat antolatu dute Astigarragan, gaur arratsalderako. Leyre Cano irakasle eta psikopedagogoak eskainiko du, 18:00etan hasita Erribera kulturgunean: 'Arauak eta mugak, nola ezarri era asertibo batean?'. Euskeraz izango da saioa.
Hitzaldiaren izenburuak dioen bezala, seme-alabei arauak eta mugak ezartzeko moduari buruz ariko da Cano. Horretarako, familia-hezkuntzako hainbat eredu ezagutaraziko ditu, eta azalduko du nola jarri behar diren arauak eta mugak, familia-harremanak orekatuak, osasungarriak eta onuragarriak izateko, eta baita gatazkak ekiditeko ere.
Arlo horretan esperientzia zabala dauka Leyre Canok. Psikopedagogian eta Jarduera Fisikoaren eta Kirolaren Zientzietan lizentziatua da, eta Magisteritzan diplomatua. Donostian eta Frantzian (Toulouse eta Paris) aritu da lanean, irakasle, psikopedagogo, hezitzaile, kudeatzaile, coach, koordinatzaile eta kirol entrenatzaile gisa. Esperientzia hori baliatuta, formakuntza eta akonpainamendua eskaintzen du egun.
Saioa doakoa izango da, baina beharrezkoa da aldez aurretik izena ematea. Horretarako, 943 33 10 67 telefonora deitu daiteke, edo euskaraetahezkuntza@astigarraga.eus helbide elektronikora idatzi.