LANEKI ekartearen eta jakinbai.eus webgunearen sorburua gabezia batetik abiatzen da...
Lanbide Heziketan euskaraz irakasteko kezka hori aspaldikoa da. Irakasle talde batek ekin zion lanari, eta 2001ean sortu zen euskara sustatzeko Lanbide Heziketako Laneki elkartea. D ereduaren alde egiteko apustua egin zen orduan. Ikasmateriala, ordea, erdaraz zegoen. Bestalde, ikasgaiak ugari dira: Lanbide Heziketan, zortzirehundik gora. Argitaletxeen aldetik oso zail zegoen, eskaintza hain dibertsifikatua izatean ikasmaterial bakoitzaren hartzaile kopurua oso txikia delako. Ez zen, beraz, errentagarria. Bide hori alde batera utzita, irakasleak hasi ziren euskarazko ikasmateriala sortzen. Laneki Hetel Lanbide Heziketako ikastetxeen elkarteak eta Ikaslan Gipuzkoa Lanbide Heziketako Institutu Publikoen Elkarteak sortu zuten. Hasiera hasieratik webgune bat sortzea erabaki zen, digitalki eskegi eta zabaltzeko.
Internet erdigunean ipini zenuten. Oso garbi eduki zenuten hori...
Ekoizpen gastu handia saihestu genuen, eta ikasmateriala eraldatzeko eta berritzeko aukera eskaintzen digu webguneak. Abantaila horiei heldu diegu aurrera egiteko. Sarearen iraultza hori garrantzia handikoa izan zen euskarazko ikasmaterialak landu ahal izateko. Sortu dugun erremintaren antzeko eredurik ez dugu inon topatu, orain arte. Alta emandako 5.000 erabiltzaile ditugu, material hori eskuratu eta irakaskuntzarako erabiltzen ari direnak.
Urtez urte ikasmaterial gehiago euskaratzen ari zarete. Oker ez bagaude, 2016an 41 ikasmaterial ezberdin euskaratu zenuten. Zeren arabera erabakitzen duzue zein den lehentasunezkoa?
Ikasturte hasieran, irailean, plangintza egiten hasteko irakasle taldeen artean galdeketa luzatzen dugu. Zerrenda jasotzen dugu, une honetan 80 proposamen ezberdin ditugu, eta ikasmaterial bakoitzaren hartzaile kopurua eta beste hainbat faktore kontuan hartuz, proposamen bakoitzari puntuazioa ematen diogu. Aurrekontuaren arabera euskaratzen dugu ikasmateriala, urtero-urtero. Irailetik abendura bitarteko prozesua da hori. Ondoren, argitaletxe ezberdinekin euskaratu beharreko materialaren itzulpen baimenak negoziatu behar izaten ditugu. Diru zati handi bat baimen kontuetan joaten zaigu. Baimenak lortuta, euskaratzeari ekiten diogu.
Zenbaterainokoa da Buruntzaldeko Udalen ekarpenaren garrantzia?
Erabatekoa. Buruntzaldeko Udalen aldetik sostengu garrantzitsua jasotzen ari gara. Eta ez bakarrik sostengu ekonomikoa. Egitasmoarekin bat egiten dutela sentitzen dugu: Zabalkundean laguntza ematen digute, ekarpenak egiten dizkigute. Harreman estua izaten dugu ikasturte osoan zehar. Eskualdeko euskara zerbitzuetako teknikariekin eta Lanbide Heziketa ikastetxe ezberdinetako hizkuntza normalkuntzarako arduradunekin lortu dugun harreman horri garrantzia handia ematen diogu.
Lanbide Heziketari eta enpresa munduari lotuta, iaz garrantzia handia eman zitzaion Lanpres gidari. Ekoizpen lan hori ere zuena da. Zer da Lanpres?
Lanbide Heziketan euskaraz ikasitako ikasleak, maiz, enpresa munduan praktikaldia egiterakoan, erdarara jotzeko joera izaten zuen. Eta hori bideratzeko eta zuzentzeko eskaera zehatza jaso genuen. Gida bat ekoiztea erabaki genuen, paperean eta internet sarean dagoena. Funtsean, ikasleak euskarazko praktikaldia egiteko argibideak eskaintzen dira gida horretan. Orain arte egiten ez zen galdera sinplea dago gidaren oinarrian: Enpresako instruktorea euskal hiztuna al da edo ez? Euskalduna baldin bada, informazio osoa eskaintzen zaio. Galdera sinple bat funtsezkoa izan daiteke. Dagoeneko praktikaldia egiteko idazkietan galdera hori txertatzea lortu dugu. Buruntzaldea egitasmo berri horren eragile nagusietakoa izan da.
Gidak sei atal ditu, lau atal ikastetxeei bideratuta eta ikaslea praktikaldian hartuko duen enpresari bideratuta beste bi atal.
Bada, dagoeneko enpresa mundutik antzeko gida berria egiteko proposamena jaso dugu, baina bereziki enpresa ikuspuntutik. Zeregin horretan gabiltza, Lanenpres Gida izena hartuko duena.
ESKUALDEAREN EKARPENA
Andoain, Astigarraga, Hernani, Urnieta eta Usurbil herrietako udal laguntzaren eta probintzia nahiz Euskadi mailako erakundeen finantziazioari esker ikasmateriala euskaratzen dihardu Laneki elkarteak. Buruntzaldeko Udalek 7.000 euroko diru ekarpena egin zuten iaz, eta egitasmo osoaren aurrekontua 186.000 eurokoa da.
IKASMATERIALA
Jakinbai.eus webgunean ehunka ikasgai eskegita daude, Euskal Herri osoko Lanbide Heziketa ikastetxeetan erabili ahal daitezkeenak. Euskaratutakoa ugaria eta zabala da, alor guztiei dagokiena. Besteak beste, administrazioa eta kudeaketa, elektrizitatea eta elektronika, eraikuntza eta obra zibilak, fabrikazio mekanikoa, garraio eta ibilgailuen mantenimendua, informatika eta komunikazioa, merkataritza eta marketina, osasungintza, ostalaritza eta turismoa, segurtasuna eta ingurumena, zurgintza, eta abar luzea.
LANPRES GIDA
Iazko berrikuntzarik nabarmenetakoa izan zen Lanbide Heziketan. Proiektuaren xedea Lanbide Heziketako ikasleek
lantokiko prestakuntza eta ikasketa duala euskaraz egin ahal izatea da. Hori ahalbidetzeko, Eusko Jaurlaritzak enpresetarako gida aurkeztu zuen. Lan horren ardura Laneki elkartearena izan zen.