Maiatzeko plenoan landutako gaien balorazioa egin du EH Bilduk, eta bereziki nabarmendu du, udal idazkariak zapuztu egin duela «EAJren nahia, mozioen eztabaida oztopatzeko. 2017ko irailean, EAJk proposatu zuen, eduki ekonomikoa zuten mozioak eztabaidatzeko, kontuhartzaileen txostena beharrezkoa izatea. EH Bildu eta PSE-EEren kexen aurrean, idazkariaren txostenaren zain geratu zen gaia; eta azkeneko plenoan, argi utzi zuen EAJk proposatutakoa zinegotzien oinarrizko eskubideen kontrako neurria zela, eta beraz, onartezina».
Salatu du, ez dela zinegotzi eta herritarren partehartzearen kontra egiten duen aurreneko saiakera: «ezohiko plenoetan oposizioko zinegotziei hitza kendu nahi izan zien, eta ondoren, plenora gerturatzen ziren herritarrei. Guztietan, idazkariak ziurtatu du legearen kontrako neurriak zirela. EAJk arazo bat dauka demokrazia eta partehartzearekin, eta Udala bere enpresa pribatu bat bezala kudeatu dezakeela uste du. Herritarrekiko eta haiek aukeratutako ordezkariekiko errespetu gehiago eskatzen diogu».
Horrez gain, beste hiru gai ere aipatu ditu EH Bilduk. Batetik, kritikatu du EAJk ez bat egitea Kataluniako preso politikoen askatasun eskaerarekin: «aurkeztu genuen mozioan, PSE-EEren kontrako botoa aurreikusi zitekeen, baina EAJren abstentzioa, harritzekoa. Lotsagarria da, inolako elkartasun keinurik adierazteko gai ez izatea, bere burua abertzaletzat duen alderdi batek. Eta arduragabekeria, aitzakia izatea dagoeneko gehiegi hitz egin dela Kataluniari buruz. Ciudadanos, PP eta PSOErekin lerratu dira».
Era berean, EH Bilduk salatu du «EAJren eta PSE-EEren hipokresia», pentsiodunen gaian: «mozioa aurkeztu zuten, eta abstenitu egin ginen, beraien ageriko hipokresia salatzeko; EAJk babestu egin zuen %0,25eko igoera, 2017ko PPren aurrekontuak onartuta; eta PSE-EEri gogorarazi genion, beraiek izan zirela pentsiodunei murrizketak aplikatzen bakarrak. Gainera, entzungor egin diete, pentsiodunen aldeko neurriak hartzeko eskaerei».
Eta azkenik, adierazi du bi alderdiek komertzio txikia baztertu eta merkataritza gune haundien alde egin dutela: «horrelako gehiago ez irekitzeko eskatuz, mozioa aurkeztu genuen, baina kontra bozkatu zuten. Astigarragan, Biurrarena enpresaren partzelan, 2.000 m2ko gune komertziala ireki nahi dute, eta alkatea lotsarik gabe ausartu zen esatera, komertzio txikiari mesede egingo diola», kritikatu du.