Bederatzi puntuko gai ordenari Martxoaren 8ko adierazpenak bozkatzeko puntua gehitzea adostuz eman zioten hasiera asteazkenean, Astigarragako Udaleko Plenoari.
Besteak beste, 2018ko udal aurrekontuak behin betiko onartu zituzten, baina Udal Gobernu Taldearen eta oposizioaren arteko erabateko zatiketarekin; alkatearen kalitatezko botoa behar izan zen onarpenerako, EAJk alde eta EH Bilduk kontra bozkatu baitzuten. Aurretik, aurkeztutako alegazio batzuk onartu ala ez bozkatu zen, eta Herri Eskolako jangela haunditzearekin lotutakoak eztabaida sortu zuen, zinegotzien artean eta zinegotzi eta bertaratutako gurasoen artean.
Gainontzeko puntu guztiak ere onartu ziren; gehienak, aho batez. Baina Martxoaren 8ko adierazpenen inguruan ere izan zen eztabaidarik.
Hainbat guraso, «minduta, haserre eta lotsatuta, horrelako arduragabekeria ikusita»
Aurreko Plenoko akta aho batez onartu ondoren, 2018 udal aurrekontuari egindako alegazioak ebatzi eta aurrekontua behin betiko onartzea bozkatzeari ekin zioten, baina eztabaida sortu zen, alegazioak medio.
Zorione Etxezarraga alkateak azaldu zuen EAJk ez zuela teknikariaren txostenaren aurka egingo: «Bi erreklamazio ezin direla bideratu esaten du, eta guk ez dugu eztabaidatuko». Horrela, proposatu zuen txostena onartzea, erreklamazio batzuk gutxiestea eta 8.523.553,47 euroko aurrekontuari behin betiko onarpena ematea.
Andoni Gartziak, ordea, EH Bilduren izenean, kontu-hartzaileari galdetu zion erreklamazioak banaka bozkatzeko eskumenik ba ote zuen Plenoak, eta baietzaren ondoren, denon adostasunarekin, hala egin zuten.
Batetik, sagardogileek eskatutako sagardotegietara joateko autobus zerbitzuaren inguruan eztabaidatu zuten. EH Bildu kontra agertu zen: «eskaera egiten duten 13 sagardotegiek ordaindu behar lukete, bakoitzak 1.200 euro; eta erabiltzaileek ere ordainduko balute, hori ere ez». Zorionek, berriz, azaldu zuen «aurrekontuetan txertatu ezin denez, dirulaguntza bideratzeko asmoa» zegoela. Botoetan berdinketa zegoenez, alkatearen kalitatezko botoarekin onartu zen.
Haurreskolako lokal txikiaren egoeraren inguruan, berriz, alokairu kontratua apirilean bukatzen dela-eta, EH Bildu erostearen alde agertu zen, eta EAJ, alokairua luzatzearen alde.
Azkenik, eztabaida haundiena Herri Eskolako jangela txikia haunditzearen inguruan sortu zen. Andoni Gartziaren esanetan, «Udalak esan zuen, Organo Gorenak eskatzen bazuen, egingo zela, eta orain esaten duzue Hezkuntzak duela azken hitza». Zorione Etxezarragak erantzun zion Gurasoen Elkarteak egindako erreklamazioa Organo Gorenak berresten bazuen, «kreditu txertaketa egitean haundipen horretarako behar dena txertatuko» zuela azaldu zuela.
Plenora bertaratutako gurasoak ez ziren ados agertu alkateak emandako azalpenarekin. «Ulertu genuen aurrekontuetan sartuko zenutela Organo Gorenak eskatuz gero. Baina uko egiten diozue. Minduta, haserre eta lotsatuta gaude, horrelako arduragabekeria ikusita. (...) Obrarako epeek emango ez dutenez, aurrekontuetan txertatzea egokiagoa ikusten dugu, eta horregatik jarri genuen erreklamazioa». Andoni Gartzia EH Bilduko bozeramaileak ere gurasoekin egin zuen bat: «Haurreskola berria eta jangela berria ez dira prest egongo datorren ikasturterako».
Eztabaidak eztabaida, berdinketa kasu guztietan bezala, alkatearen kalitatezko botoarekin erabaki zen erreklamazio hori ez onartzea eta aurrekontuak behin betiko onartzea.
Martxoaren 8rako, bi mozio
Gainontzeko erabakietan adostasun haundiagoa izan zen: aholkularitza eta defentsa juridikoaren zerbitzua kontratatzea EH Bilduren abstentzioa eta EAJren aldeko botoekin onartu zen, eta aho batez onartu ziren diru-laguntzen plan estrategikoaren aldaketa, herri bide baten kalifikazio juridikoa aldatzeko herritar batek egindako eskaera baztertzea, Oialume bidetik Olabide eta Lagatxaga baserrietara doan bidea herri-bide ez izendatzea, eta Oialume bidea 42ko pabilioia berrantolatzeko azterlanari behin betiko onarpena ematea.
Martxoaren 8aren bueltako adierazpenen inguruan, EAJk jaso berri zuen Eudelen adierazpena aurkeztu zuen, eta EH Bilduren abstentzioarekin onartu zen: «urteko adierazpen garrantzitsuena greba izanda, ez du aipatu ere egiten». EH Bilduk Berdintasun Bilkurak egindako greba proposamena hobetsi zuen; hau aho batez onartu zuten bi taldeek.
*Adierazpena ikusgai webgunean: www.kronika.eus
Udal gobernu taldea
«Jangelaren bueltan sortutako alarmarekin kezkatuta gaude»
Bi txandatan, «jangela txikian 180 haur eta haundian 360» kabitzen direla dio.
Prentsa ohar bidez azalpenak eman nahi izan ditu Udal Gobernu Taldeak, asteazkeneko Plenoan, Herri Eskolako jangela txikia haunditzeko gurasoek egindako eskaera aurrekontuetan txertatzea ez onartu izanak sortutako eztabaidaren ondoren.
«Datuek erakusten dute jangela txikia ez dela betetzera iristen»
EAJren gobernua «kezkatuta» agertu da, «Herri Eskolako guraso batzuen artean, jangela medio, sortzen ari den alarmarekin». Guraso Elkatearen bidez, «espazio faltagatik», jangela txikia haunditzea eskatu zaio Udalari. Baina Udal Gobernu Taldeak dio «haunditzeko premiazko beharrik ez» dagoela.
Datuetan oinarritzen da horretarako. «Herri Eskolak bi jangela dauzka. Txikienean, 180 haur kabitzen dira, eta haundian, 360; bi kasuetan, bi txandatan. Eskolako zuzendaritzak, Guraso Elkarteak, irakasleek, zerbitzuetako langileek eta udal ordezkari batek osatzen duten Organo Gorenak, otsaileko datuen berri eman zuen lehengo asteko bileran. Datuek erakusten dute jangela txikia ez dela betetzera iristen. Eta jangela haundiaren kasuan, datuak esanguratsuagoak dira: beste 100-120 ikasle gehiagori jaten emateko tokia legoke, oraindik».
«Partida bat jasotzeko prest»
Datuen berri izan baino lehen, Hezkuntza Delegazioarekin harremanetan jarri zela dio EAJk, jangela haunditzeko Guraso Elkarteak egindako eskaera medio, eta Organo Gorenaren bileran azaldu bezala, berretsi du «haunditze lan horietarako partida ekonomiko bat jasotzeko prest» dagoela, Eusko Jaurlaritzak beharrezkoa ikusiz gero, «azken hitza berea baita, eskola publikoari dagokionez».
Gauzak horrela, Eusko Jaurlaritzaren erantzunaren zai daudela azpimarratu du.